მაშველებმა საჰაერო მილში ჩავარდნილი კნუტები ამოიყვანეს.
ცხოველთა მონიტორინგის სააგენტოს მაშველებმა დიდ დიღომში, პეტრიწის ქუჩაზე კორპუსის საჰაერო მილში ჩავარდნილი ორი კნუტი ამოიყვანეს.
სააგენტოს დახმარებისათვის კორპუსის მცხოვრებლებმა მას შემდეგ მიმართეს, რაც რამდენიმე საათის განმავლობაში კნუტების ამოყვანას უშედეგოდ ეცადნენ. როგორც აღმოჩნდა, ორი კნუტი საჰარო მილში სხვენიდან ჩავარდა, სადაც ადგილობრივმა მცხოვრებლებმა ზამთრის სუსხისგან დასაცავად ხუთ პატარა ცხოველს სამყოფელი მოუწყეს და ყოველდღიურად ზრუნავდნენ მათზე.
მაშველებმა რამდენიმესაათიანი ძებნის შემდეგ, კნუტების მდებარეობა ზუსტად განსაზღვრეს და მესამე სართულის სიმაღლეზე გაჭედილი ცხოველები საჰაერო მილიდან უსაფრთხოდ ამოიყვანეს.
კნუტებზე მზრუნველობას კვლავ ადგილობრივი მოსახლეობა გააგრძელებს, რომელთაც ძველი საჰაერო მილებიც დალუქეს.
გთხოვთ გაითვალისწინოთ, რომ სამომავლოდ, აღნიშნული შემთხვევების თავიდან აცილება ძალიან მარტივი საშუალებით, კორპუსის სახურავსა და სხვენში საჰაერო მილებისათვის რკინის ბადის დაფარებით, ან დალუქვით არის შესაძლებელი.
